Policia e Vlorës ka arritur të arrestojë autorin e plagosjes së dyfishtë që ndodhi mbrëmjen e djeshme në qytetin bregdetar.
27-vjeçari R.K. me banim në Tiranë, është vënë në pranga pas afro një orë kërkimesh teksa ndodhej në lagjen “8 Nëntori”. Dhëndri i familjes pas një konflikti të çastit për motive të dobëta plagosi me thikë vjehrrin dhe kunatin e tij, Xhevdet dhe Albion Braushi.
60-vjeçari ndodhet jashtë rrezikut dhe gjendja paraqitet e stabilizuar ndërsa djali rreth 30 vjeç ndodhet në gjendje kritike për jetën.
NJOFTIMI I POLICISË:
Plagosi me mjet prerës (thikë), vjehrrin dhe kunatin e tij dhe u largua nga vendngjarja, kapet dhe vihet në pranga pas një orë kërkimesh e ndjekjeje nga shërbimet e Policisë.
Shërbimet e Komisariatit të Policisë Vlorë, pas marrjes së njoftimit se gjatë një konflikti të çastit për motive të dobëta, në lagjen “1 Maji”, Vlorë, ishin plagosur me mjet prerës (thikë) dy shtetas, menjëherë shkuan në vendngjarje.
Si rezultat i reagimit në kohë dhe i veprimeve të shpejta hetimore dhe profesionale të kryera në vendngjarje është bërë i mundur identifikimi i autorit të dyshuar.
Shërbimet e Policisë pas afro një orë kërkimesh kanë lokalizuar, kapur dhe prangosur, në lagjen “8 Nëntori”, autorin e dyshuar shtetasin R. K., 27 vjeç, banues në Tiranë.
Ky shtetas pas një konflikti të çastit për motive të dobëta, ka plagosur me mjet prerës (thikë), vjehrrin dhe kunatin e tij, shtetasit Xh. B., 61 vjeç dhe A. B., 30 vjeç, të cilët ndodhet në spital, nën kujdesin e mjekëve.
Në vendngjarje në cilësinë e provës materiale, shërbimet e Policisë gjetën dhe sekuestruan 2 mjete prerëse thika.
Vijon puna për dokumentimin e plotë të kësaj ngjarjeje.
