Gjatë konferencës për shtyp ku shpalosi masat e sigurisë për ditën e martë, Kreu i Policisë së Shtetit Muhamet Rrumbullaku nuk ‘i shpëtoi’ pyetjes për fatin e Ervis Martinaj, për të cilin deri më sot nuk kishte asnjë përgjigje.
Rrumbullaku u përgjigj shkurt duke thënë se policia ishte në rrugë të mbarë për zgjidhjen e rastit në fjalë duke theksuar se sot kishte dalë në konferencë për shtyp për masat e sigurisë në lidhje me Samitin e 6 dhjetorit.
“Sot jemi për një çështje tjetër më madhore. Por do t’ju përgjigjem shkurt. Policia e shtetit është në rrugë të mbarë për hetimin e rastit për të cilin ju i referoheni. Ne mendojmë se jemi në rrugën e mbarë për të zgjidhur rastin”– tha Rrumbullaku.
Më herët, familjarë të Martinajt deklaruan në media akuza të forta ndaj politikanëve të rendësishëm në vend duke theksuar se ata kanë gisht në zhdukjen e djalit të tyre.
Martinaj u zhduk në fillim të gushtit dhe pamjet e fundit në lidhje me të janë fiksuar pranë një qendre tregtare në Tiranë. Deri më tani ka patur mjaft spekulime, por as prokuroria dhe as policia nuk kanë thënë diçka më tepër mbi rastin në fjalë.
