Holanda e ka mbyllur në avantazh të dyfishtë pjesën e parë ndaj SHBA-së duke hedhur një hap të madh drejt kualfikimit për në çerekfinalet e Kupës së Botës.
Takimi nisi me një rast të pastër për amerikanët në minutën e 4-t, me Pulisiç i cili gjuan por gjen përgjigjen e portierit Nopert.
Në minutën e 10-të, në aksionin e parë të mirëfilltë të holandezëve vjen goli i parë me Dumfris i cili pason në qendër për Depaj. Ky i fundit nuk gabon me gjuajtjen e tij duke dërguar topin në rrjetë.
Në minutat në vazhdim kundërzbritjet në krah janë arma e Holandës, duke pritur shumë poshtë SHBA për t’u nisur me shpejtësi drejt zonës kundërshtare me Depaj, Gakpo e Dumfris.
SHBA provon të kundërpërgjigjet me aksione të gjata, por pa mundur për të rrezikuar portën holandeze.
Ndërkohë në minutat shtesë të fraksionit të parë të lojës, Holanda shënon golin e sigurisë. Dumfris nis një tjetër pasim në qendër nga e djathta, këtë herë është Blind i cili gjuan në kuadrat dhe gjen golin.
