Gjuha e shthurur dhe fyese e përdorur ditën e djeshme në intervistën për TVPink, ku sulmoi ashpër Albin Kurtin dhe Bashkimin Europian, duke paralajmëruar edhe bojkotin e plotë nga Serbia të Samitit të liderëve të BE-së dhe Ballkanit Perëndimor në Tiranë, duket se nuk e shqetëson aspak Aleksandër Vuçiç.
Presidenti serb teksa zbuloi dje se askush nga Serbia nuk do të jetë në samitin e Tiranës më 6 dhjetor, iu drejtua Kurtit dhe BE-së me këto fjalë: “Po heshti me muaj e vite, po i duroj budallallëqet e të gjithëve në rajon e botë. Ai llumi-terrorist do të duhej të merrte dënimin e merituar të Bashkimit Evropian. Natyrisht nuk e mori. Mund të llomotisni se Serbia qenka fajtore por nuk bën përshtypje fare. Ta shohim se çfarë do të bëni e si do ta bëni. Atij llumit-terrorist një porosi: ‘Kujdesu që të mos lëndosh asnjë serb, bashkë me këta kuislingët që zgjodhe’. Pasi që serbët do të dinë të të përgjigjen. E ju nga Evropa, turp të keni, e kjo është asgjë në krahasim me atë që dua t’ju them”.
Degradimi i gjuhës së Vuçiç erdhi pasi emërimit si ministër të Nenad Rasiç dhe këshilltares Rada Trajkoviç në kabinetin e qeverisë së Albin Kurtit.
Por, pavarësisht kritikave që mori pas deklaratës, Vuçiç duket se nuk është penduar aspak dhe qëndrimin e tij e mbrojti sot në një konferencë të përbashkët për mediat me Komisionerin për Zgjerim, Oliver Varhelyi.
Vuçiç iu drejtua qytetarëve serbë duke thënë se nuk është as i dehur dhe as i çmendur për deklaratat që ka dhënë, duke derdhur sërish “vrer” në sy të Varhelyit për ndërkombëtarët.
“Fola dhe e njoha Varhelhyn me pikëpamjen tonë për situatën në Kosovë. Më duhet të them që nuk jam as i çmendur, as i dehur, as budalla, gjithçka që pi është çaj kamomili dhe Coca-Cola Zero, por theksova gjithçka që ka ndodhur që nga fillimi i vitit, dhe si çdo lloj mundësie për një bisedë normale me palën e Prishtinës gradualisht po shembet. Nuk u pendova për asnjë fjalë. E kam fjalën për gjithçka që kam thënë për Kurtin, Trajkoviç dhe Rashiç. Gjithçka thashë dje, e them edhe sot“, tha presidenti serb.
Ndërkohë Komisioneri Evropian për Zgjerim, Oliver Varhelyi tha se është shumë e rëndësishme që në samitin e 6 dhjetorit në Tiranë, Vuçiç të jetë i pranishëm.
