Një anëtar i Komisionit të Gjobave në Policinë Rrugore është arrestuar nga forcat e rendit pasi akuzohet për marrje ryshfeti në këmbim të kthimit të lejeve të drejtimit, pasi ato u ishin pezulluar qytetarëve me afate të caktuara sipas ligjit për qarkullimin rrugor.
Mësohet se pas hekurave ka shkuar Alkid Ndreu, i cili punonte në komisionin në varësi të Drejtorisë Vendore të Policisë Tiranë.
Agjencia e Mbikëqyrjes Policore kishte nisur hetimet disa muaj më parë për Ndreun në bazë të disa denoncimeve që kishin mbërritur nga qytetarët. Rasti më i freskët i marrjes së ryshfetit nga 48-vjeçari ka ndodhur ditën e djeshme, ku Ndreu është arrestuar në flagrancë.
Ai i mori shumën prej 70 mijë lekësh të reja qytetares me iniciale B.D., të cilës i ishte pezulluar patenta për tre muaj.
Nga verifikimet ka rezultuar se asaj i ishte bllokuar leja e drejtimit që nga data 24 nëntor deri më datë 17 shkurt të vitit 2023.
Por qytetarja përdori lidhjet me sekserin Eduart Caka nga Kruja, për t’i dorëzuar paratë te efektivi Ndreu, i cili shfrytëzoi detyrën për të marrë patentën e vajzës nga Kartoteka në varësi të Drejtorisë së Policisë Tiranë dhe ia riktheu asaj.
Për këtë arsye policia vuri në pranga edhe sekserin Caka, ndërsa shoferja B.D. u procedua në gjendje të lirë.
Njoftimi i AMP:
Drejtoria Rajonale e A.M.P-së Tiranë ka arrestuar një ditë më parë në flagrancë të punonjësit të policisë Alkid Ndreu me detyrë specialist i administrimit të dokumentave dhe anëtar i OASH, i dyshuar për veprat penale të “Shpërdorimit të detyrës” e kryer në bashkëpunim, si dhe shtetasit E.C., i dyshuar për kryerjen e veprës penale “Ushtrimi i ndikimit të paligjshëm ndaj personave që ushtrojnë funksione publike” e kryer në bashkëpunim.
Gjithashtu, në lidhje me këtë ngjarje është proceduar në gjendje të lirë edhe shtetasja B.D., e dyshuar për kryerjen e veprës penale “Ushtrimi i ndikimit të paligjshëm ndaj personave që ushtrojnë funksione publike” e kryer në bashkëpunim.
Veprimet e mësipërme u kryen nga AMP Tiranë pas autorizimit nga Prokurori i gatshëm, në bazë të të dhënave të mbledhura në rrugë operative se shtetasja B.D. kishte arritur të merrte Lejen e saj të Drejtimit, e cila ishte e bllokuar nga OASH me afat 3 mujor, kundrejt një shume prej 70.000 lekësh e dhënë në formën e rryshfetit tek personat përgjegjës. Nga veprimet hetimore në vijim u bë e mundur gjetja dhe sekuestrimi i Lejes së Drejtimit që në atë moment posedohej nga shtetasja B.D.
Vijimi i veprimeve bëri të mundur identifikimin e kapjen e personit ndërmjetës, shtetasi E.C., i cili duke shfrytëzuar njohjet dhe kundrejt shpërblimit financiar të paligjshëm, ka bërë të mundur marrjen e lejes së drejtimit nga punonjësi i policisë A.N., i cili ka detyrimin ligjor të administrimit deri në skadencë të vendimit të OASH dhe dorëzimin e lejes tek shtetasja B.D.
Materialet proceduriale i dërgohen Prokurorisë pranë Gjykatës së Shkallës së Parë Tiranë për veprime të mëtejshme, ndërsa po punohet për identifikimin e punonjësve të tjerë të implikuar në këtë ngjarje.
