Mario Muka është 42-vjeçari shqiptar që ka mbetur i vdekur në një atentat me armë zjarri në Duseldorf të Gjermanisë.
Muka u qëllua 3 herë me armë zjarri në kokë nga një person ende i paidentifikuar, i cili u largua me shpejtësi nga vendngjarja dhe dëshmitarët okularë e panë që të shoqërohej dhe nga një person i dytë.
Ngjarja e rëndë ndodhi mbrëmjen e së hënës në qytezën e Krefeld, me dëshmitarët që dëgjuan disa të shtëna rreth orës 19:50 dhe panë dy burra duke ikur në errësirë.
Shqiptari ishte i njohur për policinë për grabitje dhe trafik droge. Megjithatë sipas mediave gjermane ai nuk ishte një “lojtar i madh” në këtë biznes, por një tregtar i vogël që kishte konsumuar edhe vetë lëndë narkotike.
Ndërkohë, sipas BË Mario Muka rezulton të jetë pronar i një karburanti në “Katër Rrugët” e Shijakut.
Mësohet se ai kishte emigruar drejt Gjermanisë në vitin 2018.
Ndërkohë, autoritetet po vijojnë kontrollet për zbardhjen e pistës së krimit dhe kanë kërkuar të dhëna për 42-vjeçarin, duke nisur që nga shenjat e gishtërinjve dhe dosjen e tij, nëse është i skeduar nga policia.
