Në mediat britanike nuk kanë të ndalur artikujt që vendosin shqiptarët si temë të ditës.
Edhe në ditën e Pavarësisë, kur qindra shqiptarë janë grumbulluar përmes thirrjeve në rrjetet sociale përreth zonës së “London Eye” duke festuar e hedhur valle nën ritmet e këngëve patriotike dhe me flamurin kombëtar në duar, DailyMail ka gjetur motiv për t’i kritikuar emigrantët nga vendi ynë.
Tabloidi i njohur është ndalur te luksi që shfaqin emigrantët shqiptarë, duke iu referuar këtu makinave të tyre të shtrenjta, me të cilat janë ekspozuar mbrëmjen e djeshme përgjatë paradës së zhvilluar në rrugët kryesore të Londrës.
“Videot e postuara në internet tregojnë Lamborghini, Mercedes, Audi, Range Rover dhe Porsche 4×4 që bllokojnë trafikun rreth Westminster ndërsa oficerët e Policisë Metropolitane përpiqen t’i lëvizin ato makina. Në video të ndryshme shihen burra dhe gra duke valëvitur flamurin shqiptar dhe duke u rënë borive teksa varen nga xhamat e makinave të tyre”, nënvizohet në artikull.
Më tej kritikohen disa prej shqiptarëve që kanë shfrytëzuar rastin për të xhiruar gomat e makinave luksoze dhe kryer manorva të rrezikshme sipas medias angleze.
Ndërkohë nuk mungojnë as foto e disa vajzave të reja të veshura me fustane tradicionale, që kërcenin në rrugë valle tradicionale.
“Fishekzjarrë të fuqishëm u lëshuan ndërsa vargu i gjatë i automjeteve u binin vazhdimisht borive për të festuar pavarësinë e Shqipërisë, e cila përkujtohet çdo vit më 28 nëntor”, nënvizohet më tej.
Por, MailOnline nuk është ndalur me kaq dhe ka kontaktuar Policinë Metropolitane duke kërkuar një koment, sipas tyre për trafikun e shkaktuar nga shqiptarët, që ka ndezur “zemërim te shoferët, me disa që i cilësuan festimet si egoiste”.
“Shqiptarët në Londër që festonin Ditën e Pavarësisë bllokuan me egoizëm sheshin Strand dhe Trafalgar, ndërsa njerëzit dilnin nga teatrot në orën 22:00. Trafiku ishte i tmerrshëm, një orë vonesë”, shkroi një përdorues i Twitter.
Një tjetër shtoi: “Një nga arsyet pse m’u deshën shumë vite për të shkuar në shtëpi dje”, ndërsa një shofer paralajmëroi: “Mos shkoni në qytet, trafiku është një makth”.
Të tjerë mbrojtën shqiptarët pasi përdoruesit e Twitter komentuan numrin e makinave luksoze.
@albaniantopg Last night was 🔥 #Abania #shqipet_ne_london #london #shqip ♬ πρωτότυπος ήχος – Grfr99
“Disa makina të bukura këtu, por shumica më duken mjaft të zakonshme (shumë makina të reja të gamës së mesme duken kështu këto ditë)”, shkroi një përdorues i rrjetit social.
Në vijim të shkrimit kritik, DailyMail ndalet sërish te çështja e azilkërkuesve shqiptarë që kalojnë Kanalin anglez me gomone dhe përfitojnë sipas tyre nga sistemi i dështuar i emigracionit në vend.
Sipas tyre, shifrat e zbuluara këtë javë treguan se shqiptarët përbënin pak më shumë se një të tretën e njerëzve që kishin kaluar Kanalin Anglez me gomone në 9 muajt e parë të këtij viti.
“Është një rritje e mprehtë në krahasim me vitet e mëparshme, ku vetëm 3% e të ardhurve në vitin 2021 ishin me kombësi shqiptare dhe vetëm 1% në 2020. Në tre muaj nga korriku deri në shtator, 45% e të ardhurve me gomone ishin shqiptarë (9,076) dhe në disa ditë shifrat arrinin deri në 80%”, nënvizohet më tej.
Burimi: DailyMail/ Përshtati: Boldnews.al
