Një 30-vjeçar që rezultonte i shpallur në kërkim pasi ka qëlluar me armë zjarri në drejtim të dy vëllezërve në mars të 2021 në Shkodër, është vënë në pranga nga policia në kryeqytet.
Sipas Bluve të Tiranës, shtetasi Besmir Perkola u ndalua teksa qarkullonte me armë zjarri në automjetin që e drejtonte me leje drejtimi false. Atij i është sekuestruar arma e zjarrit pistoletë me municion luftarak dhe patenta false që përdorte për të shamngur forcat e rendit.
Sa i përket ngjarjes së ndodhur më 20 mars 2021, dy vëllezërit Hot dhe Marian Doçi mbetën të plagosur pasi Besmir Perkola qëlloi me armë në drejtim të tyre në fshatin Bardhaj të Shkodrës.
“Rreth orës 19.45, në fshatin Bardhaj, në rrethana ende të paqarta janë plagosur me armë zjarri dy vëllezërit M.D., 23 vjeç dhe H.D., 30 vjeç, të cilët janë transportuar në spital për ndihmë mjekësorë, jashtë rrezikut për jetën. Menjëherë në vendngjarje kanë shkuar shërbimet e Komisariatit të Policisë Shkodër, forcat Shqiponja dhe ato të Sektorit Kundër Krimeve ndaj Personit në DVP Shkodër”, njoftonte asokohe policia.
Dy vëllezërit e plagosur në deklarimin për policinë thanë se nuk kishin asnjë konflikt dhe nuk e kishin idenë përse ishte qëlluar në drejtim të tyre, e madje nuk e njihnin autorin.
“Ishim tek makina kur një person u afrua dhe qëlloi drejt nesh në mënyrë të papritur. Nuk e kemi idenë përse na ka qëlluar sepse nuk kemi ndonjë konflikt”, deklaruan asokohe dy vëllezërit Doçi për policinë.
Njoftimi i policisë:
Tiranë/ Finalizohet nga Forca e Posaçme “Shqiponja” dhe Komisariati i Policisë Nr. 2, operacioni policor i koduar “Arratia”.
Shërbimet e Forcës së Posaçme “Shqiponja” dhe shërbimet e Komisariatit të Policisë Nr. 2, në vijim të punës për goditjen e paligjshmërive, kapjen e personave në kërkim dhe atyre që qarkullojnë me armë zjarri, bazuar dhe në inteligjencën informative, kanë organizuar dhe finalizuar operacionin policor të koduar “Arratia”.
Gjatë këtij operacioni, në rrugën “Frang Bardhi”, shërbimet e Policisë kanë ndaluar automjetin tip “Benz”, me drejtues shtetasin B. P., 30 vjeç. Gjatë kontrollit, në çantën e 30-vjeçarit, u gjetën dhe u sekuestruan në cilësinë e provës materiale, një armë zjarri pistoletë dhe municion luftarak, si dhe një leje drejtimi e dyshuar e falsifikuar.
Pas verifikimeve të kryera, ka rezultuar se ky shtetas ishte shpallur në kërkim, pasi në mars 2021, në Shkodër, ka qëlluar me armë zjarri, në drejtim të shtetasve M. D. dhe H. D. (vëllezër).
Në mars 2021 janë arrestuar edhe dy vëllezërit, pasi janë konfliktuar me shtetasin B. P.
Materialet i kaluan Prokurorisë, për veprime të mëtejshme.
