Garë e fortë në grupin A të Kupës së Botës, ku dy biletat diskutohen mes tre kombëtareve. I eliminuar tashmë, Katari do luajë kundër Holandës një sfidë ku ‘tulipanëve’ ju duhet të paktën një pikë për të kaluar më tej dhe fitorja nëse duan të fitojnë grupin.
Përballë një skuadre pa objektiva, ky synim mund të jetë mëse i mundshëm për ekipin e teknikut Van Gaal, që udhëheq ekipin drejt raundeve me eliminimin direkt në turneun më të rëndësishëm në glob. Sfidë me tepër me interes është edhe ajo mes Senegalit dhe Ekuadorit.
Amerikano-jugorët të favorizuar edhe me një barazim për të kaluar më tej, teksa afrikanët janë të detyruar për të fituar. Një 3 pikësh do i shërbente kampionëve të Afrikës për të vijuar rrugëtimin në Botëror. Të dy duelet do luhen në orar të njëjtë, në orën 16:00.
Situatë krejtësisht e ndryshme në grupin B. Të katër kombëtaret janë në garë për të siguruar kualifikimin, verdikt që do mësohet pas sfidave të orës 20:00. Anglia kryesuese sfidon Uellsin në një përballje të tërë britanike.
Kombëtarja e “Tre luanëve” numëron 4 pikë në vendin e parë dhe luan për dy rezultate në fushën e stadiumit “Ahmad bin Ali”.
Anglezët janë të favorizuar, me bilancin që flet në favor të tyre, 11 fitore dhe një barazim. Iran-Shtetet e Bashkuara të Amerikës është dueli tjetër i kësaj sfide. Përballje që ka marrë edhe vëmendje të madhe për shkak të përplasjeve politike mes dy kombeve.
Iranianët duan që të lënë jashtë Kupës së Botës amerikanët, pasi edhe një pikë do ishte me tepër vlera për ta për të vijuar rrugëtimin në Katar 2022.
