Ish-infermierja në Shtëpinë e Kujdesit për të Moshuarit “Orenda” në Pejë, Aurona Pelaj, së bashku me koleget e saj, Altina Rexhepi dhe Remzie Kuqi janë liruar nga paraburgimi ditën e sotme.
Ndërkaq është publikuar foto e parë e Pelajt, teksa pi cigare, dhe shijon lirinë.
Një reagim ka ardhur nga vajza e të moshuarës që u dhunua, duke thënë se nëna e saj me këtë vendim gjykate është dhunuar për së dyti herë.
“Vendimi për lirimin e të pandehurave nga paraburgimi ditën e sotme nga Gjykata Supreme e Kosovës, plagën tonë në zemër vetëm sa e ka thelluar. Shoku i shkaktuar nga pamjet e dhunës që i ushtrohet nënës time, për ‘Gjykatën Supreme’ paska qenë lehtë i gëlltitshim dhe me këtë veprim kjo gjykatë ‘dhunoi’ për të dytën herë nënën time!”, shkruan Zhaneta.
Edhe avokati i familjes së të moshuarës, Meshari Selimaj, ka reaguar duke thënë se, sot besimi në drejtësi për këtë rast u shua.
“Vendimi i Gjykatës Supreme për lirimin nga paraburgimi i të pandehurave në këtë fazë të procedurës, ku akoma nuk ka përfunduar procedura hetimore dhe akoma ekziston rreziku i madh që të ndikohet në ndryshimin dhe asgjësimin e provave, është tregues i qartë se cilat janë tendencat për trajtimin e mëtutjeshëm të këtij rasti, relativizimi i tij, dhe në fund lirimi nga aktakuza apo shqiptimi i ndonjë dënimi me gjobë. Me ditën e sotme besimi në drejtësi për këtë rast u shua”, deklaroi ai.
