Thuajse e gjithë familja e ish-kreut të Komunës Frakull, Viktor Çervanaku, tashmë është pas hekurave.
Burime policore informojnë se vetë Viktori, djali i tij i vogël, Denilsoni dhe e fejuara e këtij të fundit, E.F, janë arrestuar, në vijim të operacionit, ku u zbulua një laborator kokaine në shtëpinë e tyre, në Fier.
Ndërkohë, më herët është arrestuar nga policia e Tiranës djali tjetër i Viktor Çervanakut, Anxhelino, i dyshuar për “vrasje në tentativë”.
Në maj të vitit 2020, uniformat blu të kryeqytetit njoftuan se “kapet nga shërbimet e Komisariatit të Policisë Nr. 2, një person i shpallur në kërkim, i dënuar për veprat penale “Vrasja e kryer në gjendje të tronditjes së fortë psikike në tentativë” dhe “Armëmbajtja pa leje”.
Specialistët për Hetimin e Krimit në Komisariatin Nr. 2, në vijim të punës për kapjen e personave të shpallur në kërkim, kanë lokalizuar dhe kapur shtetasin Anxhelino Çervanaku, 27 vjeç, banues në Tiranë, i shpallur në kërkim nga Drejtoria Vendore e Policisë Fier, pasi në korrik të vitit 2014, ka plagosur me armë zjarri për motive të dobëta, shtetasin B. M.
Ky shtetas ishte shpallur në kërkim nga Drejtoria Vendore Policisë Fier, pasi Gjykata e Apelit Vlorë, e ka dënuar me 5 vjet burg, për veprat penale “Vrasja e kryer në gjendje të tronditjes së fortë psikike në tentativë” dhe “Armëmbajtje pa leje”.
Veprimet e mëtejshme për ekzekutimin e vendimit të Gjykatës u kryen nga specialistët për Hetimin e Krimit në Drejtorinë Vendore të Policisë Fier.
Ndërkohë, në pranga aktualisht janë Viktor dhe Denilson Çervanaku, të dyshuar se janë të përfshirë në ndërtimin e laboratorit të kokainës në Frakull të Fierit, ku u gjet një sasi e madhe lënde narkotike, e fshehur në thasë me lëndë kimike.
Nga BoldNews.al
