Ambasadorja e BE në Shqipëri, Christine Hohmann, ka reaguar lidhur me anulimin e grantit prej 28 milionë eurosh për Portin e Durrësit nga Bashkimi Europian.
E pyetur nga mediat se çfarë qëndrimi ka ajo për projektin e Portit të Durrësit, Hohmann deklaroi se BE-ja i qëndron të njëjtit vendim të marrë disa ditë më parë.
Ajo u shpreh se sa herë ka ndryshim të kushteve të investimit, rrjedhimisht ndryshohet dhe dhënia e granteve. Prandaj, sipas ambasadores, ato anulohen.
“Është një përgjigje shumë e thjeshtë si ajo që dhamë disa ditë më parë. Sa herë që ka ndryshim të kushteve të investimit, pra ndryshim të dhënies së granteve për investimin, atëherë kjo anulohet. Por kjo nuk do të thotë që ne nuk jemi në komunikim me qeverinë për të kuptuar se ku do të jenë investimet për t’u bërë”, tha ambasadorja e BE-së nga Shkodra.
Përmbytjet
Diplomatja europiane vuri theksin te masat që duhet të merren për parandalimin e tyre, ose të paktën minimizimin sa të jetë e mundur të pasojave nga përmbytjet.
“Çdo euro e investuar në parandalim kursen 100 euro të tjera të investuar në pastrim pasi të ketë ndodhur katastrofa. Mbajtja pastër e kanaleve të kullimit, pastrimi i tyre para kohe është një masë shumë e rëndësishme që të parandalohet kjo përmbytje, por natyrisht nuk është e mjaftueshme siç mund ta shohim”, tha ajo.
Ambasadorja deklaroi se BE do të ofrojë mbështetjen e saj në këtë drejtim.
“Edhe bashkia Shkodër ka bërë kërkesë të marrë imazhe, pamje satelitore në mënyrë që të kuptojë situatën në komunitet. BE është këtu, nuk u ikën problemeve. Ne jemi këtu për t’ju ndihmuar në mënyrë që të zhvillohen dhe kapacitetet në mënyrë që edhe ju të reagoni sa më shpejt”.
