Vrau kunatin natën e Vitit të Ri, Apeli i Tiranës dënon me 8 vite burg Klajdi Shundi
Vetëm 8 vite burg do të kryejë 35-vjeçari Klajdi Sundi, i cili më 1 janar të vitit 2021, pak pas festimeve për Vitin e Ri i mori jetën kunatit të tij Vladimir Zvezhda.
Është gjykata e Apelit që ka vendosur sot të zhvlerësojë vendimin e Gjykatës së Shkallës së Parë Tiranë, e cila e dënoi Shundin me 20 vite burg në shkurt të këtij viti.
Apeli deklaron se 35-vjeçari nuk ka kryer vrasje me dashje, pasi ngjarja ka ndodhur në kushtet e tronditjes së thellë psikike, duke i shkurtuar kështu 12 vite nga dënimi.
Sa i përket ngjarjes së rëndë ajo ndodhi rreth orës 03:00 të mëngjesit në lagjen “5 Majit” në Tiranë.
Shundi në gjendje të rënduar pasi kishte konsumuar alkool e qëlloi me thikë burrin e motrës, i cili ndërroi më pas jetë në spital.
Kur Vladimir Zvezhda do largohej me gruan e dy vajzat ai është konfliktuar sërish me të shoqen, Silvën.
Mbesa e madhe ka telefonuar dajën, Klajdin duke i thënë: “Daja mami e babi po zihen, eja të lutem“. Kur Klajdi Shundi ka dalë tek shkallët e pallatit ka patur në dorë një thikë dhe ka parë kunatin duke u zënë me të motrën.
Kaq ka mjaftuar që ai ta godiste me thikë duke i shkaktuar plagosje të rëndë. Zvezhda u dërgua në spital por pa mundur t’i mbijetojë plagëve.
