Kryeministri i Kosovës, Albin Kurti është “zbrazur” për çdo detaj të takimit të shumëdiskutuar midis tij dhe Aleksandër Vuçiç dy ditë më parë në Bruksel.
Në mbledhjen e sotme të qeverisë Kurti tha se qëllimi i vetëm i këtyre takimeve duhet të jetë marrëveshja finale, duke akuzuar krye diplomatin europian Josep Borrell se “hoqi dorë” nga propozimi paraprak i BE-së.
“Liderët shtetërorë thirren për ta bërë marrëveshjen e madhe e finale. Po e ripërsëris, unë nuk jam as polic, as komandant stacioni, as shef kadastri, as zyrtar dogane që të merrem me gjithfarë çështjesh teknike të cilat dalin përgjatë bisedimeve. Ne jemi shtet me institucione dhe organe përkatëse të cilat kanë shumë njerëz të zotë”, tha Kurti.
Sipas shefit të qeverisë kosovare, Borrell i është përshtatur më shumë qëllimit të Serbisë për çështjen e targave ilegale dhe kanë hequr nga agjenda e takimit me presidentin e Serbisë çështjen kryesore që ishte “përqendrimi me urgjencë në propozimin evropian për normalizim të marrëdhënieve”.
“Në të tretin thirrej për nisje të menjëhershme për propozimin e BE-së në nivel të lartë për të arritur marrëveshje para marsit të vitit 2023. Pas takimit që patëm atje, Borrelli fatkeqësisht e ndryshoi premisën e negocimit. Në kundërshtim nga parimi i propozuar nga vetë ai, filloi të insistojë në marrëveshje që adreson vetëm masat e mirëbesimit, pezullimin e gjobave për targat. Qëllimi i madh u hoq nga agjenda. Nevoja urgjente për propozimin evropian me mbështetje franko-gjermane u zhduk nga tavolina, duke iu përshtatur qëllimit të Serbisë, presidenti i së cilës kishte ardhur në Bruksel jo për propozimin e BE-së, por për targat”, deklaroi Kurti.
Ai ka thënë se fillimisht propozimi ka qenë vetëm që Kosova të pezullojë fazën e dytë të vendimit për gjobitje të atyre që bartin targa ilegale. Megjithatë, Kurti ka shtuar se Kosova u pajtua që t’i jepte hapësirë propozimit, në mënyrë që Serbia të ndalte regjistrimin e veturave me targa ilegale.
“Propozimi u pranua dhe besoj se ishte një arritje e rëndësishme e takimit”, shtoi ai.
Ndër të tjera, Kurti tha se ka bërë përpjekje për arritjen e një marrëveshjeje atë ditë, ndërsa theksoi se ishte i fundit që e doli nga ndërtesa e BE-së.
“Unë isha i fundit që e lëshova ndërtesën e BE, sepse gjithmonë ka hapësirë për një përpjekje të fundit. Ka qenë edhe përpjekja e fundit. Lajçak ka ardhur te dhoma ku ndodhej delegacioni ynë, e bëri edhe një përpjekje për një tekst që do të përfshinte edhe tekstin e BE-së, por më pas na njoftoi që presidenti i Serbisë s’e kishte pranuar, por Borrell ndodhej në një konferencë për media”, nënvizoi kryeministri i Kosovës.
