Është zbardhur ngjarja e ndodhur në Përrenjas mesnatën e së hënës ku ndodhi një shpërthim në një lokal.
Nga hetimet rezultoi se në verandën e lokalit të shtetasit Dh. K., është hedhur një granatë dore.
Policia bën me dije se në pranga kanë rënë Rei Karriqi, 23 vjeç dhe Arjan Pino, 41 vjeç, të dy banues në lagjen Nr. 2, Përrenjas, Librazhd.
Po ashtu uniformat blu raportojnë se njëri prej të ndaluarve, është me precedent të theksuar kriminal, në Shqipëri dhe në Itali, për vepra penale në fushën e krimeve ndaj personit dhe pronës.
“Specialistët për Hetimin e Krimeve të Komisariatit të Policisë Librazhd, nën drejtimin e Prokurorisë pranë Gjykatës së Rrethit Gyqësor Elbasan, falë veprimeve të shpejta hetimore dhe profesionale, në vendngjarje, me qëllim grumbullimin e çdo prove për zbardhjen dhe dokumentimin e kësaj ngjarjeje, identifikuan, shoqëruan dhe ndaluan shtetasit: Rei Karriqi, 23 vjeç dhe Arjan Pino, 41 vjeç, të dy banues në lagjen Nr. 2, Përrenjas, Librazhd. Nga veprimet hetimore të deritanishme rezulton se këta 2 shtetas, në bashkëpunim me njëri-tjetrin, janë autorët e dyshuar të hedhjes së një granate dore, në verandën e lokalit të shtetasit Dh. K”, njofton policia.
Në cilësinë e provës materiale, u sekuestruan 2 aparate celulare ndërkaq vijon puna, nën drejtimin e Prokurorisë, për dokumentimin e plotë të motivit dhe të rrethanave të kësaj ngjarjeje.
Materialet procedurale i kaluan Prokurorisë pranë Gjykatës së Rrethit Gjyqësor Elbasan, për veprime të mëtejshme hetimore.
