Kombëtarja serbe e futbollit do të jetë i dyti ekip ballkanas që së bashku me Kroacinë do të përfaqësojë rajonin në Kupën e Botës Katar2022.
Por situata në kampin serb duket se nuk është e qetë dhe shkak për tensionin e krijuar është bërë fanella që gjigandi i veshjeve sportive Puma ka përgatitur për ta.
Fanella që do të mbajnë veshur yjet si Mitroviç e Vlaholiç është pritur me polemika në Beograd, pasi Federata Serbe e Futbollit ka vendosur që të përdorë një stemë të re.
Logoja e re është krijuar posaçërisht për edicionin e Kupës së Botës, por ka ngjallur tërbim në rrjetet sociale teksa shumë tifozëve serbë u ngjan me shqiponjën dykrenare në flamurin e Shqipërisë.
Federata Serbe pretendon se kjo shqiponjë është mesjetare, por tifozët nuk kanë kapërdirë faktin se ajo nuk ka përdorur shqiponjën që është në stemën e Serbisë, por një tjetër me krahë të hapur që i ngjan shqiponjës së flamurit shqiptar, apo edhe atyre të Polonisë apo Malit të Zi.
Një situatë e çuditshme duke llogaritur se katër vite më parë, pikërisht në Kampionatin Botëror, shqiponja me dy krerë u kthye në makthin e Serbisë pas golave që u shënuan Shaqiri dhe Xhaka në fazën në grupe në fitoren 2-1 të Zvicrës.
