Është mbyllur në barazim pa gola pjesa e parë mes Danimarkës dhe Tunizisë, takim i vlefshëm për Grupin D të Kupës së Botës.
Minutat e para nisën qetë me skuadrat që studionin njëra-tjetrën duke mos rrezikuar shumë. “Shkëndija” e parë e takimit vjen në minutën e 13-të teksa tunizianët rrezikshëm provojnë duke krijuar iluzionin e golit, me Kristensen që ka devijuar topin duke e dërguar në goditje këndi.
Ndërkohë Danimarka provon kundërpërgjigjet me disa tentativa, por pa qenë e saktë përpara portës. Në minutën e 23-të tundet rrjeta për herë të parë me Tunizinë që shënon me Jebali, por arbitri anësor ngre flamurin lart për pozicion jashtë loje.
Në të 43-tën, Tunizia humbet një rast flagrant për shënim. Sulmuesi Jebali ka shpërdoruar golin e sigurt, vetëm 5 metra larg portës.
Në minutat e mbetura të fraksionit të parë të lojës, të dyja skuadrat provojnë kundërsulmin për të gjetur golin e parë të ndeshjes por pa sukses.
