Mediat italiane kanë zbardhur detaje të reja nga ngjarja e rëndë që ndodhi rreth orës 21:00 të mbrëmjes së të dielës në Spinea të Italisë, ku një çift shqiptarësh u vranë në banesën e tyre.
37-vjeçarja Mynevere Karabollaj (mbiemri i vajzërisë Vera Myrtaj) dhe partneri i saj 23-vjeçar Flonino Mërkuri u gjetën të vdekur në banesën e ndodhur në rrugën “Leopardi”. Alarmin e ngriti vajza e saj 15-vjeçare, e cila kishte telefonuar që nga ora 17:00 nënën e saj, por ajo nuk i përgjigjej.
Duke u kthyer në shtëpi pas një pasdite me miqtë, ajo hapi derën dhe u gjend përballë trupit të një burri, ndërsa e frikësuar kërkoi ndihmë nga fqinjët të cilët lajmëruan policinë.
Fillimisht u dyshua nga hetuesit se mund të kishin të bënin me vetëvrasje, por më pas agjentët zbuluan 37-vjeçarja dhe i dashuri i saj ishin vrarë.
Autori i krimit mendohet se është ish-bashkëshorti i Vera Myrtaj, i cili u arratis pas ngjarjes me një makinë, ndërsa krimi dyshohet të jetë kryer prej tij pasi nuk donte të pranonte lidhjen e re të 37-vjeçares.
Sa i përket viktimës, ajo jetonte prej rreth 8 vitesh në Itali, ku ishte shpërngulur nga Greqia. Vera kishte jetuar në Spinea që prej vitit 2015 dhe kishte një partner të ri prej disa vitesh.
Në vendin e ngjarjes, hetuesit gjetën një armë zjarri dhe një thikë. Dy bashkëjetuesit kanë marrë plagë vdekjeprurëse me thikë. Mjekësia ligjore ka shqyrtuar shtëpinë ku ndodhi tragjedia, duke kërkuar të dhëna të dobishme për të përvijuar konturet e një historie ende për t’u sqaruar.
Karabinierët i kanë shtrirë kontrollet edhe në disa shtëpi fqinje, pasi ka gjasa në fakt që viktimat të kenë tentuar të fshihen te fqinjët e tyre para se të vriteshin.
