Policia e Lezhës ka zbardhur ngjarjen e ndodhur rreth orës 04:00 të mëngjesit të sotëm në Ishull Shëngjin ku u shkrumbua plotësisht automjeti tip “Mercedes Benz” i biznesmenit të hidrokarbureve Ndue Pjetrushi (Noshi).
Automjeti që ndodhej i parkuar buzë rrugës para vilës 3-katëshe u përfshi nga flakët, por vetë Pjetrushi në një prononcim për mediat mohoi të ketë konflikte që mund të çonin në një zjarrëvënie të qëllimshme.
Ndërkohë pas hetimeve të kryera Blutë e Lezhës kanë dalë në përfundimin se shkak i zjarrit është bërë një defekt teknik në makinë.
Njoftimi policisë Lezhë:
Zbardhet shkaku i djegies së automjetit të shtetasit N.P.
Rreth orës 04:00 të mëngjesit të sotëm, është marrë njoftim se në Ishull Shëngjin po digjej automjeti tip “Benz”, në pronësi të shtetasit N. P., 56 vjeç, të cilin ky shtetas e kishte parkuar në rrugë, në afërsi të banesës.
Menjëherë është ngritur një grup i posaçëm hetimor nga strukturat hetimore të Komisariatit të Policisë Lezhë, i cili nën drejtimin e Prokurorisë pranë Gjykatës së Rrethit Gjyqësor Lezhë dhe në bashkëpunim me ekspertë të MZSH Lezhë, ka kryer veprimet hetimore për sqarimin e plotë të rrethanave të ngjarjes.
Si rezultat i veprimeve hetimore të shpejta dhe profesionale, bazuar dhe në ekspertimin piroteknik të kryer, ka rezultuar se djegia e automjetit nuk është shkaktuar nga faktorë të jashtëm, por nga probleme teknike të automjetit.
Për këtë arsye ngjarja është klasifikuar aksidentale. Materialet procedurale janë referuar në Prokurorinë pranë Gjykatës së Rrethit Gjyqësor Lezhë, për vlerësim.
Intervista e biznesmenit për gazetarët:
Ndue Pjetrushi: Rreth orës 3:50 kam dëgjuar një shpërthim, si shpërthim i mbytur. Kam dalë në ballkon dhe e kam parë makinën duke u djegur. Në moment kam lajmëruar policinë, kanë ardhur, erdhi dhe zjarrfikësja bashkë me to, bënë ato procedurat e veta.
Keni dyshime për zjarrvënie të qëllimshme?
Ndue Pjetrushi: S’kam asnjë konflikt me kërkënd. Besoj të gjithë që më njohin e dinë që s’jam i problemeve.
Me çfarë merreni?
Ndue Pjetrushi: Në fushën e hidrokarbureve, transport nafte Shqipëri-Kosovë. Unë për vete nuk dyshoj. Mund të jetë edhe zjarrëvënie e qëllimshme, mund të jetë edhe që ka marrë vetë. Atë mund ta nxjerrin vetëm hetimet.
Kamerat e shtëpisë nuk kanë qenë në funksion?
Ndue Pjetrushi: Jo, kanë një javë që s’më kanë punuar, DVR-ja ka pasur probleme dhe e kam çuar për ta riparuar.
