Pas debateve që ndodhën në seancën e djeshme parlamentare për çështjen e ministres për Evropën dhe Punët e Jashtme, Olta Xhaçka, grupi i deputetëve të Enkelejd Alibeajt ka depozituar sot në Gjykatën Kushtetuese një kërkesë për shpalljen të pavlefshëm të mandatit të saj.
Gazmend Bardhi në një konferencë për mediat nga selia e Kuvendit tha se është rast unik në botë, që një ministre të përfitojë drejtpërdrejtë të mira publike, duke iu referuar vendimeve të Komitetit të Investimeve Strategjike në favor të kompanive në zotërim të bashkëshortit të saj, ish-deputetit socialist, Artan Gaçi dhe familjarëve të tjerë të ministres.
Kërkesa e grupit të Alibeajt bazohet te vendimi nr. 3/5, datë 29/03/2021 “Për miratimin e statusit “investim/investitor strategjik procedurë e asistuar” për projektin e investimit “DREAMADES LUXURY SUITES”,që garanton përfitime nga pasuria e shtetit për familjen e Xhaçkës.
“Shqipëria është rasti unik në botë ku ministri për Europën dhe Punët e Jashtme, deputetja Xhaçka gëzon njëkohësisht dhe statusin e partnerit strategjik për një investim në Himarë me vlerë 5.5 mln euro. Me vendim të eprorit të saj, Rama, ministrja Xhaçka dhe bashkëshorti i saj kanë përfituar të drejtën për të përdorur pronën publike për aktivitetin e tyre tregtar për fushën e hoteleri turizmit”, tha Bardhi.
Në vijim ai kërkoi nga Kushtetuesja që vendimi për këtë kërkesë të trajtohet me shpejtësi.
“Kjo bie ndesh me nenin 7 të Kushtetutës që i ndalon deputetët që të përfitojnë fonde publike apo të përfitojnë pronë publike. Grupi parlamentar i PD i kërkon Gjykatës Kushtetuese që të marrë në shqyrtim pa vonesë kërkesën e depozituar dhe të garantojë zbatimin e këtij ndalimi kushtetues pavarësisht se bëhet fjalë për një njeri të rëndësishëm të kabinetit qeveritar”, nënvizoi Bardhi.
