Prokuroria në Viçenza të Italisë ka kërkuar dënimin me burg përjetë të muratorit shqiptar Gëzim Alla, i cili vrau duke goditur disa herë me çekiç në kokë dhe bark, bashkëshorten e tij Dorina Alla.
Ngjarja e rëndë ndodhi më 18 prill të vitit 2021, me 52-vjeçarin që u justifikua para hetuesve duke thënë se e vrau bashkëshorten 39-vjeçare pasi ajo e kishte fyer dhe ofenduar.
Gëzimi, i cili në Shqipëri kishte punuar edhe si polic, kur u pyet për të sqaruar pozitën e tij tha: “Di që po vendosja një tavolinë në garazh”.
“Më shau e më tha që jam plehrë dhe më pështyu. Nuk e kujtoj dot nëse ishim në garazh apo kuzhinë, por ajo që ndodhi më pas është fshirë nga mendja ime”, sqaroi 52-vjeçari.
Ndërkohë, sipas hetimeve shkak i debatit e më pas krimit të rëndë është bërë marrëdhënia e tyre martesore.
Sakaq në kërkesën e prokurores Alessandra Block drejtuar gjyqtarëve të Gjykatës së Asizeve, e formuluar dje më 17 nëntor pas më shumë se dy orësh aktakuzë nënvizohet se vrasja e Dorinës ndodhi teksa fëmijët e çiftit ndodheshin në shtëpi, të mbyllur në dhomën e gjumit.
Krimi u krye brenda shtëpisë së çiftit në Pove del Grappa, në zonën Bassano, në provincën e Viçenzës.
Për konsulentin e caktuar nga gjyqtarët për të kryer një vlerësim psikiatrik, Alla në kohën e vrasjes kishte zotëruar plotësisht aftësitë e tij mendore dhe për këtë arsye atij i atribuohet plotësisht akuza e “vrasjes me dashje”.
Prokuroria thotë se rrethanat ndaj shqiptarit janë rënduese sepse ai ka vijuar ta godasë disa herë fort të shoqen edhe pse ajo ishte në tokë e pamundur për të mbrojtur veten.
Pala civile, e përfaqësuar nga avokati Dario Lunardon, i cili mbron dy fëmijët e mitur të çiftit kërkoi një shumë të përkohshme prej 200 mijë eurosh në total, për të mundësuar kështu aksesin në një fond shtetëror që siguron dëmshpërblim për viktimat e dhunës.
