Nga foltorja e Kuvendit, deputeti i PD, Ervin Salianji ka shtruar disa pyetje për ministrin e Brendshme, Bledi Çuçi, ku një prej tyre lidhet me zhdukjen e Ervis Martinajt. Salianji tha se situata e krimit në vend ka dalë jashtë kontrollit, ku punonjës të policisë i shërbejnë kriminelëve.
Ai pyeti Çuçin nëse ka dijeni që personi, i cili shoqëronte Ervis Martinajn ka dëshmuar duke dhënë emra të oficerëve të lartë të policisë.
Salianji tha ndër të tjera, se kjo qeveri dhe ministria e Brendshme vetëm qarkullojnë emra, pasi të gjithë drejtuesit e policisë janë të njëjtit.
Salianji: “Vetëm keni bërë qarkullim, i merrni nga këtu i çoni aty. Janë të njëjtit njerëz. Prandaj situata e krimit është kështu. Prandaj punonjësit e policisë së shtetit, këta që kanë mbetur përdoren si bodigardë të krimit. Njeri prej tyre me një super të kërkuar që sot është i zhdukur apo i vrarë dhe ju nuk e thoni dot. Meqë jemi këtu, a keni ju dijeni zoti ministër që personi që shoqëronte Ervis Martinaj ka dhënë dëshmi duke përmendur emra të oficerëve të lartë të policisë së shtetit që i shërbenin krimit. Nëse po, pse nuk veprohet për të marrë masa ndaj tyre dhe për ti cuar para përgjegjësisë. A kanë ata një mbrojtje politike? A përdoret edhe në këto raste, në rastet e të kërkuarve dhe super kërkuarve policia e shtetit për t’ju ruajtur krahët kriminelëve. Dua tju them edhe dëshminë e ish drejtorit të Policisë së Shtetit, i cili tha se operacioni për kapjen e shumë të kërkuarve është dekonspiruar. Nga kush është dekonsipuiruar, kush do ti bëjë këtë hetime? Ky që nuk i skuqet fytyra dhe nuk ka turp?”
