Deputetët e Listës Serbe të cilët dhanë dorëheqje ditë më parë nga mandatet e tyre në Kuvendin e Kosovës, janë zëvendësuar me deputetë të tjerë të kësaj partie. Kështu u bë e ditur në seancën e sotme plenare të Kuvendit, nga kryeparlamentari Glauk Konjufca.
Në Kuvendin e Kosovës sot u betuan: Millan Kostiq, Zoran Maksimoviq, Svetislav Gjokiq, Ksenija Bozhoviq, Radosh Mihajlloviq, Bilana Makshiq, Milan Joksimoviq, Nenad Radenkoviq, Olivera Zdravkoviq dhe Cvetko Velkoviq nga partia Iniciativa qytetare për Liri, Drejtësi dhe Mbijetesë. Menjëherë pas betimit, këta deputetë u larguan nga salla e Kuvendit.
Më poshtë emrat e deputetëve të dorëhequr të Listës Serbe dhe emrat e zëvendësuar:
- Slavko Simiç zëvendësohet me Milan Kostiç nga Lista Serbe
- Igor Simiç zëvendësohet me Zoran Maksimoviç nga Lista Serbe
- Miljana Nikoliç zëvendësohet me Olivera Zdravkoviç nga Lista Serbe
- Zoran Mojsiloviç zëvendësohet me Milan Joksimoviç nga Lista Serbe
- Verica Çeraniç zëvendësohet me Ksenija Bozoviç nga Lista Serbe
- Branislav Nikoliç zëvendësohet me Rados Mihajloviç nga Lista Serbe
- Milosh Pervoviç zëvendësohet me Nenad Radenkoviç nga Lista Serbe
- Ljubinko Karadzhiç zëvendësohet me Svetislav Jokiç nga Lista Serbe
- Jasmina Dediç zëvendësohet me Biljana Maksiç nga Lista Serbe
- Dragana Antonijeviç zëvendësohet me Cvetko Veljkoviç nga GI SPO
Lista Serbe tha se nëntë deputetët e rinj të kësaj partie u betuan sot në Kuvendin e Kosovës për të “verifikuar teknikisht mandatet e tyre” dhe “për t’i mbajtur ato në duar të sigurta”.
“Theksojmë se ky vendim strategjik dhe politik në asnjë mënyrë nuk do ta ndalë procesin e largimit nga institucionet e Kosovës në veri të Kosovës dhe Metohisë, me të cila janë shuar të gjitha institucionet e Kosovës”, thuhet në komunikatën e Listës Serbe.
