Julian Ahmataj mund të marrë drejtimin e Skënderbeut. Sipas raportimeve trajneri i Tiranës U-19 shihet si i duhuri për të qenë në krye të pankinës korçare. 43-vjeçari e njeh mirë ambientin bardhekuq duke qenë se e drejtoi Skënderbeun nga vera e vitit 2020-të deri në fillim të 2021-shit.
Kujtojmë që sot drejtuesit e klubit korçar shkarkuan trajnerin Migen Memelli për mungesë rezultatesh. Edhe pse objektivi madhor është rikthimi në Superiore, me këtë Dinamo dhe Flamurtar në super formë është e vështirë që Skënderbeu t’i bashkohet më të mirave të kampionatit shqiptar. Pritet me interes të shihet se çdo të ndodhë me pankinën korçare, teksa në “pole-position” është Julian Ahmataj.
Skënderbeu renditet në vendin e shtatë në Kategorinë e Parë me vetëm 13 pikë të grumbulluara. Korçarët kanë një ndeshje të prapambetur, ku do të përballen me Apoloninë. Nga kohët e arta e deri në këtë sezon futbollistik, situata te bardhekuqtë nuk duket të jetë më e mira e mundshme.
/Newsport.al
