Policia në Gallarate të Italisë ka vënë në pranga një 41-vjeçar shqiptar që akuzohej se për 7 vite me radhë ka dhunuar fizikisht dhe verbalisht bashkëshorten e tij.
Pas një aktiviteti të imtësishëm hetimor, agjentët ranë në gjurmët e 41-vjeçarit, i cili, duke nisur nga viti 2015, ndoshta për shkak të xhelozisë së pajustifikuar, edhe në prani të fëmijëve të mitur, ka vijuar të ushtrojë dhunë ndaj gruas së tij.
Gruaja u detyrua të vuante, për shtatë vite të gjata nga bashkëshorti që vinte shpesh në shtëpi i dehur, fyerje, kërcënime me vdekje dhe sulme fizike, të cilat, në disa rrethana, i shkaktuan lëndime për ta lënë shtruar në spital.
Në vitin 2019, madje duke tundur një thikë, ai e kërcënoi se do ta vriste dhe më pas do të bënte vetëvrasje.
Në episodin e fundit të dhunës që daton korrikun e kaluar, burri, teksa dy fëmijët flinin në një dhomë tjetër, zgjoi gruan që flinte me një nga vajzat e familjes, e kapi nga krahët, e tërhoqi zvarrë në dhomën e ndenjes ku e ka goditur disa herë me shuplaka në fytyrë duke e sharë në shqip dhe kërcënuar se do e vrasë.
Ishte vetë gruaja që korrikun e kaluar mori guximin të denoncojë bashkëshortin duke kërkuar edhe sigurinë e fëmijëve të saj.
