Presidenti ukrainas, Volodymyr Zelensky ka kërkuar që ekspertëve ukrainas t’u jepet akses në “të gjitha të dhënat” e mbajtura nga partnerët perëndimorë, si dhe të lejohen të vizitojnë vendin e shpërthimit të shkaktuar nga raketa që ra në Poloni, pranë kufirit ukrainas mbrëmjen e djeshme.
“Ne duam të shqyrtojmë të gjitha detajet, gjithçka ”, theksoi ai.
“Kjo është arsyeja pse ekspertët tanë duhet të marrin pjesë në punën e hetimit ndërkombëtar dhe të kenë akses në të gjitha provat në dispozicion të partnerëve tanë, si dhe (duke i lejuar ata të shkojnë) në vendin e shpërthimit”, tha Zelensky nëpërmjet një videomesazhi sonte.
Deklaratat e fundit të presidentit tregojnë një ndryshim në qendrimin e Zelensky, i cili këmbënguli deri më herët sot se raketa në fjalë i përkiste Rusisë, duke kundërshtuar NATO-n dhe Uashingtonin që besojnë se raketa ishte një raketë kundërajrore ukrainase.
“Nuk kam asnjë dyshim se kjo raketë nuk ishte e jona”, tha presidenti ukrainas më herët. “Unë besoj se ishte një raketë ruse.”
Shtëpia e Bardhë, nga ana e saj, tha se “nuk ka parë asgjë që të kundërshtoje” vlerësimin e bërë nga Varshava, sipas të cilit raketa që ra në Poloni “me shumë gjasa” erdhi nga mbrojtja ajrore e Ukrainës.
