Banorët e Bërxullës, të cilët kanë protestuar në mënyrë të vazhdueshme për të mbrojtur tokat e tyre nga projekti i autostradës Thumanë-Kashar, e kanë zhvendosur sot tubimin përpara kryeministrisë.
Ata mbanin në duar parrullat që shkruanin “Shteti na ka shitur tek koncesionari” dhe shprehën për mediat shqetësimin se po trajtohen si skllevër dhe jo si qytetarë me të drejta të barabarta.
Banorët kërkojnë nga qeveria që të realizojë kompensimin e tyre me çmimin e tregut dhe shprehen se nuk janë kundër projektit të rrugës Thumanë-Kashar.
“Na kanë bërë tortura psikologjike, na kanë bërë torturë financiare. Drejtori i policisë, ministri, kryeministri duhet ta dinë shumë mirë se ne duhet të shpronësohemi sipas ligjit. Ata e kanë detyrim ligjor që të na sqarojnë, të na bindin dhe të na mbrojnë nga oligarkët. Ne na trajtojnë si bujkrobër, si skllevër. Ja këto janë pushtetarët tanë”, tha njëri prej banorëve.
Pavarësisht presioneve, banorët shprehen se nuk do të tërhqien nga kauza e tyre, por do vazhdojnë të protestojnë deri sa të marrin dëmshpërblimin që meritojnë.
“Le të bëhet gjaku në gju. Nuk e dorëzojmë tokën dhe as shtëpinë. Pa na dhënë shpronësimin ne nuk e lëshojmë pronën”, shtojnë ata.
