Ministria e Turizmit dhe Mjedisit që drejtohet nga Mirela Kumbaro ka nisur punimet për vendosjen e një trau elektronik, për ta bërë kështu me pagesë hyrjen për turistët dhe vizitorët në parkun kombëtar të Divjakës.
Nisja e punimeve ka nxitur reagimin e banorëve të zonës, të cilët janë ngritur sot në protestë kundër këtij vendimi të ministrisë.
Tubimit iu bashkua edhe deputetja demokrate e zonës Ilda Dhori, ndërsa qytetarët kundërshtuan vendosjen e traut duke e konsideruar në shkelje të ligjit edhe nga ana e Bashkisë që ka dhënë lejen e ndërtimit.
Sipas tyre kemi të bëjmë me një vendim abuziv që privatizon pasurinë kombëtare, pasi ndërtimi i traut do të cenojë çdo vizitor dhe bizneset që operojnë në këtë zonë.
Përfaqësuesit e këtyre bizneseve thonë se do e mbrojnë me çdo kusht pasurinë e qytetarëve për mirëmbajtjen e së cilës kontribuojnë vullnetarisht në mënyrë të vazhdueshme
Edhe më herët banorët kanë kundërshtuar hyrjen me pagesë në parkun e Divjakës, teksa më 2 shtator nisma e Ministrisë së Turizmit u cilësua si një lajthitje dhe nga vetë deputetit socialist i zonës Erion Braçe.
“Po vendosin tra në hyrje të parkut, i pyes më thonë jemi punëtor. U them kush po e bën më thonë ADZM. Edhe këtu tek moli për të bërë fotot e dasmave do të behet me pagesë. Për vendas e të huaj do të duhet të kalohet atje matanë tek trau me pagesë për të bërë xhiro në park. E shikoni ku ka arritur lajthitja në këtë vend?!”, tha Braçe në rrjetet sociale.
Asokohe edhe deputetja demokrate, Ilda Dhori tha se ekziston një vendim gjykate që e bën të pavlefshëm vendimin e ministrisë për hyrjen me biletë në parkun e Divjakë-Karavastasë.
“Dua të sjell në kujtese në 2011 ka ekzistuar trau në brendësi të pyllit, ata që kanë qenë atëherë në opozitë (PS) e kanë çuar në gjykatë dhe gjykata e shpallur të paligjshëm. Me sa informacion kam, tani vendimin e ka marrë ministria e mjedisit. Do dalim në protesta derisa të anulohet sepse banorët e kanë atraksion kryesor për të kaluar moment çlodhje“, u shpreh Ilda Dhori, deputete e PD-së.
