Mesditën e sotme në selinë e Partisë Demokratike është duke u zhvilluar mbledhja e Kryesisë, e thirrur nga kreu i saj Sali Berisha, ku do të zbulohet edhe lista me kandidatët që do të garojnë në Primare, për të nxjerrë më pas 61 emrat që do të sfidojnë socialistët në lokalet e 14 majit.
Berisha teksa fliste në nisje të mbledhjes tha se janë mbi 200 personalitete politike, të shoqërisë civile dhe të tjerë, të cilët kanë aplikuar për të kandiduar për qytetar të parë të bashkive.
“Por ne sot kemi një mbledhje me rend dite, një çështje që është themelore për aktualitetin e PD-së. Miratojmë kandidaturat e paraqitura për bashkitë në përputhje me statutin nga bashkitë e vendit. Komisioni i Operacioneve Zgjedhore më ka informuar mua se deri më tani janë mbi 200 e ca personalitete politike, të shoqërisë civile dhe të tjerë, të cilët kanë aplikuar për të kandiduar për qytetar të parë të bashkive tona”, tha Berisha.
Ai shtoi më tej se të gjithë kandidatët do të jenë misionar të rikthimit të demokracisë në “parlamentet” e qyteteve tona.
“Unë kam një falënderim për secilin prej tyre. Këta janë personalitete të shquara të partisë, të jetës publike të vendit, individë me jetëshkrim suksesi dhe secili prej tyre me kandidimin, me besimin që ka shprehur, dëshmon vullnetin për të qenë një misionar i rikthimit të pluralizmit politik dhe një shërbëtor i qytetarëve të cilët paraqiten për votëbesim në radhë të parë të anëtarësisë dhe simpatizantëve të PD, dhe më pas të qytetarëve të qytetit”, shtoi ai.
