Dy persona janë arrestuar nga policia e Sarandës, që ka sekuestruar rreth 5 kg kanabis.
Në pranga janë vënë Petrit Brahimaj 42 vjeç, banues në Greqi dhe Spartak Qama, 32 vjeç, banues në Vlorë.
“Specialistët e Seksionit për Hetimin e Krimeve të Komisariatit të Policisë Sarandë në bashkëpunim me institucionet e tjera ligjzbatuese,, mbështetur dhe nga inteligjenca informative se 2 shtetas po tentonin të trafikonin lëndë narkotike nga Konispoli në drejtim të Greqisë, organizuan dhe finalizuan operacionin policor të koduar ‘Bags’, si rezultat i të cilit u bë arrestimi në flagrancë i shtetasve të mësipërm”, njoftoi policia.
Pas lokalizimit të tyre në lagjen nr.3, efektivët kanë ushtruar kontroll në dy çantat që ata kishin me vete, në të cilat kanë gjetur dhe sekuestruar rreth 5 kg lëndë të dyshuar narkotike cannabis sativa, të ndarë në 4 pako.
