Në një aksion të forcave “Shqiponja” në Qafë-Kashar janë ndaluar dhe më pas shoqëruar Ramzan dhe Rexhep Rraja, nipi dhe djali i deputetit të Partisë Socialiste, Rrahman Rraja.
Ata janë ndaluar nga policia teksa lëviznin me mjete të blinduara tip “Audi” dhe “Mercedes Benz”.
Menjëherë pas ngjarjes, nga ambientet e jashtme të Drejtorisë së Përgjithshme të Policisë ka folur për mediat babai i Ramazanit, Xhelal Rraja, i cili tha se nuk është normale që të ndalohet djali i tij vetëm për faktin se lëviz me automjet të blinduar.
“Ajo ngjarje është vazhdim i kësaj që po them shpifje. Është sqaruar ka dhënë dëshmi janë verifikuar gjërat dhe nuk është asgjë e vërtetë. Nëse djalit tim do to faktohet gjëja më e vogël ai të përgjigjet. Nuk është në kërkim policor. Ka dy orë që rri këtu dhe nuk më ka sqaruar njeri se pse është shoqëruar. Është e vërtetë që lëviz me makinë të blinduar pse duhet të ndalohet për lëvizje më makinë të blinduar. Makinën e kam unë me autorizim, çdo gjë në rregull”, tha Rraja.
Xhelal Rraja nuk u ndal me kaq por hodhi akuza në drejtim të Drejtorit të Policisë Kriminale, Neritan Nallbati, duke aluduar për lidhjet e tij me krimin teksa tha se i “shkon rroga te shtëpia edhe këtu në Tiranë”, ashtu siç ndodhte sipas tij edhe kur drejtonte Policinë e Durrësit.
Më tej, Rraja shprehu një mesazh të drejtpërdrejtë për Nallbatin duke thënë se nëse kanë diçka personale me të ta sqarojnë në rrugë privat duke lënë mënjanë strukturat e shtetit.
“Edhe kur ka qenë drejtor police në Durrës ka marrë rrogë çdo muaj, edhe këtu në Tiranë i vjen rroga çdo muaj në shtëpi. I bëj thirrje atij zotërisë, nëse ka gjë personale me mua, le ta vazhdojë personale, mos të vazhdojë me shtetin. Kaq kisha, s’kam asgjë tjetër”, u shpreh Xhelal Rraja.
