Të tjera detaje kanë dalë në dritë rreth aksionit të repartit “Shqiponja” në Qafë-Kashar, ku fillimisht u raportua se u ndalua nga efektivët Ramazan Rraja, teksa lëvizte me një automjet të blinduar.
Operacioni është kryer pas dyshimeve se persona të ndryshëm lëviznin me mjete të blinduara dhe me armë, duke çuar në bllokimin e dy automjeteve tip “Audi” dhe një “Benz-Mercedez”.
Mësohet se përveç Ramazanit, policia ka shoqëruar edhe Rexhep Rrajan, djalin e deputetit të Partisë Socialiste Rrahman Rraja. Së bashku me ta është shoqëruar edhe kushëriri tjetër i identifikuar si shtetasi J.Rraja.
Sa i përket Ramazan Rrajas, ai nuk është një emër i panjohur për policinë, pasi në muajin gusht të 2020 ka dhunuar barbarisht një grua në ambientet e jashtme të QSUT, ndërsa në dhjetor u vu në pranga në Belgjikë, në një operacion ndërkombëtar për shkatërrimin e bandës së kokainës, ku ai ishte “koka” e grupit me anëtarë 6 shqiptarë dhe 2 të huaj.
Të arrestuarit ne Belgjikë ishin Musa Gjikola, Genti Balliu i njohur ndryshe edhe si Flamur Balliu, Ramazan Rraja, Fioralb Rraja, Bledar Pepaj dhe Fatmir Xhecuka.
Ai gjithashtu u përfol për përfshirje në masakrën e Fushë-Krujës, ku u vranë Brilant Martinaj, Besmir Hoxha dhe Diklen Vata, por reagoi asokohe për mediat dhe mohoi përfshirjen.
Ndërkohë, Rexhep Rraja u bë i njohur për publikun pasi ish e dashura e tij Xhisiela Maloku e denoncoi për dhunë dhe presion.
Ai u arrestua në 30 shtator të vitit 2018 pas denoncimit të Malokut, por kjo e fundit më pas tërhoqi akuzat duke thënë se e kishte kallëzuar djalin e deputetit pasi ishte bërë xheloze për të. Rraja u la asokohe në shërbim prove nga Gjykata.
