Rrahje, kafshim dhe dhunë seksuale në grup. Këto janë akuzat shumë të rënda që rëndojnë ndaj tre djemve shqiptarë 21, 23 dhe 29 vjeç, të arrestuar ditët e fundit nga karabinierët në Milano.
Dhuna dyshohet se ka ndodhur në një dhomë të një moteli në Cornaredo ndaj një 23-vjeçare me origjinë nga Haiti.
Sipas hetimit e reja kishte shkuar për t’u argëtuar në një disko në mbrëmjen e 2 majit, ku edhe u njoh me shqiptarët, të cilët e tërhoqën zvarrë dhe e dhunuan në ambientet e diskos derisa iu mor fryma.
Ajo çka habiti hetuesit ishte fakti se 23-vjeçarja pas episodit ne disko u largua me një prej shqiptarëve pasi kishin rënë dakord për një shërbim seksual me pagesë që do të kryhej sipas marrëveshjeve të tyre, në një hotel në qendër të Milanos.
Në vend të kësaj, djali e çoi atë në dhomën e motelit në Cornaredo, ku iu bashkuan edhe vëllai e kushëriri i të riut.
Në atë moment do të fillonte dhuna e përsëritur nga të tre të rinjtë. Shqiptarët u larguan nga dhoma e motelit në orët e para të pasdites së 3 majit, duke liruar përfundimisht të renë, e cila në atë moment u largua me vrap nga ai vend duke kërkuar ndihmë dhe duke raportuar ngjarjen tek karabinierët.
Një nga tre të arrestuarit është Alvardo Agaraj, i riu tashmë i burgosur për vrasjen në Cornaredo të Abderrahimi Elkharmoudi, 45-vjeçarit maroken që vdiq pasi u qëllua dy herë në natën e 23 tetorit pasi i ngacmoi të dashurën.
