Kreu i Partisë Demokratike, Sali Berisha me anë të një video të postuar në Facebook ka falënderuar të gjithë qytetarët që mbrëmjen e djeshme iu bashkuan thirrjes së opozitës për t’u bashkuar në një protestë kombëtare kundër keqqeverisjes së Edi Ramës.
“Mirëdita miqtë e mi të TikTok. Një përshëndetje të përzemërt dhe mirënjohje të pakufijshme, për të gjithë ju, për të gjithë qytetarët që mbushën, zbukuruan aq madhërishëm Bulevardin dje me pjesëmarrjen tuaj në protestën më të jashtëzakonshme që Tirana ka njohur!”, shprehet Berisha.
Ndër të tjera, Berisha thekson se treni i popullit opozitar tashmë nuk do të ndalet dhe shpëtimi i Shqipërisë është qëllimi që e shtyn përpara.
“Por, në këtë mesazh dua gjithashtu një falënderim dhe mirënjohje të përzemërt për të gjithë ju miqtë e TikTok që në 30 ditë e shndërruat në një histori suksesi komunikimin tonë me 1.3M shikime dhe dhjetëra e mijëra ndjekës. Së bashku ne jemi njerëz të rekordeve të mira. Treni ynë nuk ndalet më. Ai do kalojë nga një stacion fitoreje në një stacion tjetër, deri në destinacionin final. Shpëtimin e Shqipërisë, për ju, të ardhmen tuaj dhe për të gjithë shqiptarët! Zoti ju bekoftë! Faleminderit shumë!“, thotë kreu i PD.
@prof.dr.saliberisha Një mesazh falenderimi të përzemërt. #sb ♬ original sound – Sali Berisha
