Në Gjykatën e Beratit është zhvilluar paraditen e sotme seanca gjyqësore për 11 të arrestuarit e disa ditëve më parë në serat ku përpunohej kanabisi në fshatin Rërëz, të njësisë administrative Kutalli.
Për të arrestuarit Hamdi Dyli, Sidrit Bisha, Jurgen Ujkaj, Blerim Xheka, Bashkim Mema, Edison Mema, Endriol Xheka, Mirvaldo Disha, Samoel Lushaj, Drita Mema dhe Izmire Mema, gjykata ka caktuar masën e sigurisë “arrest me burg’.
Ferma e kanabisit u zbulua më 10 nëntor gjatë një aksioni “top-secret” të Drejtorisë së Përgjithshme të Policisë, ku përveç 11 organizatorëve u shoqëruan edhe 95 gra që ishin të punësuara me 5 mijë lekë dita për të pastruar bimët e kanabisit.
Të arrestuarit janë nga Drenovica, Ishmi, Lezha, Kopliku, Nikla, Kamëza apo Tirana, ndërsa në kërkim është shpallur edhe një 19-vjeçar.
Shumica e të ndaluarve nga policia të përfshirë në kultivimin e kanabisit ishin nga zonat Nikël, Burrel, Kamëz, Fushë Krujë, Shkodër dhe Lezhë, ndërsa po hetohen në gjendje të lirë.
Gjatë operacionit u sekuestrua rreth 875 kg kanabis i tharë në serën e ndarë në 4 pjesë për ta përshtatur si kapanon ku qëndronin 95 gratë e punësuara.
Pjesa më e madhe e tyre kishte 20 ditë që punonin në serë, ndërsa lënda narkotike e tharë vinte me furgon. Punëtoret e pastronin dhe e paketonin, ndërsa furgoni vinte sërish e merrte.
