Një protestues është shoqëruar nga policia.
Pas përfundimit të fjalimit të Sali Berishës, dirigjenti i protestës së thirrur nga opozita, ka ftuar qytetarët që të ndezin qirinj para kryeministrisë “për të vrarët nga pushteti”, duke u përmendur Ardit Gjoklaj, Klodian Rasha dhe Lear Kurti.
Pas kësaj, protestuesit kanë çarë kordonin e policisë dhe janë futur në shkallët e kryeministrisë.
Disa prej tyre kanë ndezur qirinj.
Në fasadën e kryeministrisë u hodh bojë kuqe në shenjë revolte.
Efektivët e policisë kanë ndërhyrë duke shoqëruar një person. Gjatë momenteve të shoqërimit, është rrëzuar dhe një efektiv.
Efektivët rivendosën sërish kordonin para kryeministrisë, ndërsa situata vijoi e qetë dhe protestuesit u larguan.
Për gazetarët, ish-deputeti demokrat Gent Strazimiri tha se i riu u shoqërua pasi donte të vendoste një flamur të Shqipërisë te dritarja e kryeministrisë.
“Për këtë flamur, donte ta vendoste te penxherja e kryeministrisë. Kaq e thjeshtë është. Po të ishte flamuri serb nuk do ndërhynin”, tha ai.
Policia, nga ana tjetër, njoftoi se protestuesi kishte thikë me vete.
“Shërbimet e Drejtorisë Vendore të Policisë Tiranë, në përfundim të tubimit kanë konstatuar një shtetas që mbante në dorë një mjet prerës dhe kryente lëvizje të pakontrolluara. Shërbimet e Policisë e kanë neutralizuar dhe shoqëruar shtetasin J.Ç., 25 vjeç, nga fshati Gurrëz e Vogël, Lushnjë, i cili nga verifikimet paraprake rezulton person me probleme të shëndetit mendor”, thuhet në njoftimin e bluve.
