Ndeshjet e futbollit shqiptar shpeshherë sjellin ngjarje të çuditshme dhe kështu ka ndodhur edhe sot në sfidën e Kategorisë së Dytë mes Veleçikut dhe Gramshit që është luajtur në Koplik. Në duelin e fituar me shifrat 4-0 nga vendasit, vendimtar ka qenë goli i parë i sfidës, pasi si pasojë e tij erdhën menjëherë tre kartonë të verdhë.
Në minutën e 23-të, Dibra shënoi golin e avantazhit për ekipin e drejtuar nga Dritan Smajli e kjo ka sjellë ndërprerjen e ndeshjes për rreth 10 minuta. Lojtarët e Gramshit kanë kontestuar golin duke pretenduar për pozicion jashtë loje, teksa kanë rrethuar gjyqtarin Kadria.
Ata e tepruan disi me protestat dhe me ofendimet ndaj tij me kryesorin i cili fillimisht i tregoi kartonin e kuq Bakut e më pas edhe Hysës dhe Metajt, duke lënë Gramshin me 8 lojtarë në vijimin e takimit që rifilloi vetëm pas ndërhyrjes së delegatit të FSHF.
Me këtë epërsi në shifra dhe në numër lojtarësh në fushë, gjithçka iu bë shumë më e thjeshtë Veleçikut të merrte tre pikët, pasi ata dyfishuan me Elbasanin në pjesën e parë të sfidës, ndërsa në të dytën shënuan edhe dy herë të tjera me Ujkajn./Panoramasport
