Misteri që shoqëronte vrasjen dhe më pas varrosjen në plazhin e Kartelës së fermerit 31-vjeçar shqiptar Eni Dollani në Kallamata të Greqisë duket se po shkon drejt zbardhjes, pasi policia ka vënë në pranga dy persona si autor të mundshëm.
Në pranga kanë rënë dy 30 vjeçar, një shqiptar dhe një vajzë greke, ndërsa në kërkim është bashkëpunëtori i tyre, një 24-vjeçar rom.
Hetuesit dyshojnë se motivi i krimit ka qenë grabitja e viktimës, pasi ai dyshohet se ka pasur në posedim një shumë të madhe parash që arrin në 10 mijë euro.
Sipas eleftheriaonline, viktima dhe autorët dyshohet se janë argëtuar mbrëmjen e së dielës në një lokal në Kyparisia.
Autorët kanë qenë në dijeni të shumës prej 10 mijë euro dhe kur grupi ka dalë nga lokali e kanë çuar 31-vjeçarin në plazhin e Kartelës, ku e kanë goditur disa herë me një send metalik në kokë, duke e lënë të vdekur.
Më pas ata e varrosën trupin në rërë për të fshehur veprën e tyre. Që në momentet e para, autoritetet policore kanë shoqëruar disa persona, kanë marrë deklarime dhe më në fund kanë mbërritur në identifikimin dhe gjurmët e autorëve.
30-vjeçari shqiptar dhe 30-vjeçarja greke janë pikasur dhe arrestuar mbrëmjen e së martës në afërsi të Zevgolatio, ndërsa 24-vjeçari është ende në kërkim.
Dy të arrestuarve iu gjetën gjithsej 5300 euro, të cilat dyshohet se vijnë nga grabitja e viktimës. Ndaj tyre dhe ndaj 24-vjeçarit është ngritur një hetim për vrasje dhe grabitje.
Të arrestuarit me dosjen e ngritur në ngarkim të tyre u dërguan në prokurori, ndërsa hetimet e policisë vijojnë nga Drejtoria e Sigurimit të Kalamatës.
