Greqia është paralizuar nga një grevë 24-orëshe mbarëkombëtare që ka përfshirë të gjithë sektorët e ekonomisë dhe administratës publike.
Tubimet më të mëdha janë realizuar në Athinë dhe Selanik, por protesta ka pasur edhe në qytete të tjera të mëdha të vendit, me qytetarët që demonstrojnë kundër rritjes së çmimeve dhe mosindeksimit të pagave të punëtorëve.
https://youtu.be/mINtC7QfKQs
“ERT” shkruan se edhe punonjësit e medias hynë në grevë 24-orëshe, po ashtu dhe punonjësit e spitaleve publike, profesorë e mësues, si dhe zyrtarë të gjykatës.
Gjithashtu, në grevë marrin pjesë dhe punonjësit e ministrive, të Tatimeve, të qeverisjes vendore, të fondit të sigurimeve dhe urbanistikës, ndërkohë që kanë deklaruar pjesëmarrje dhe punonjës të sektorit të turizmit – hotelierisë dhe Federata e Punonjësve Privatë të Greqisë.
Por protestat kanë degjeneruar në dhunë kryesisht në kryeqytet, ku ka pasur përplasje me efektivët e policisë dhe pak pas orës 13:30 janë hedhur bomba Molotov, gurë dhe kimikate.
Gjatë demonstratave edhe shoqatat studentore ndezën bomba tymuese.
E njëjta skenë ka qenë edhe në qendër të Selanikut ku pjesëmarrësit në marshimin e zonës antiautoritare kanë sulmuar forcat MAT të policisë.
Konkretisht në afërsi të Agora Romake kur një grup personash me maska në fytyrë sulmuan forcat e policisë që ndodheshin në rrugën Agios Dimitriou me bomba molotov, gurë dhe sende të tjera.
Policia, për t’i zmbrapsur, është kundërpërgjigjur duke përdorur granata trullosëse dhe një përdorim të kufizuar të gazit lotsjellës, ndërsa pak minuta më vonë ka nisur një ndjekje në rrugët e ngushta të Philippou, në sheshin Dikastiriun dhe episodet kanë përfunduar në rrugën Egnatia.
https://youtu.be/VUDC-FpZHOg
