Partizani vijon prej ditësh me ritëm maksimal përgatitjet për ndeshjen me Bylisin, megjithëse skuadrës i mungojnë plot pesë lojtarë, të cilët janë pjesë e Kombëtares për miqësoren me Katarin, që do të luhet në Spanjë.
Sakaq, pjesa tjetër nuk po pushon aspak dhe po vijon përgatitjet dita-ditës. Ditën e djeshme, trajneri i të kuqve, Xhovani Kolela, kishte vendosur t’ia kushtonte tërësisht përgatitjes fizike dhe lojtarët kanë bërë vetëm ushtrime force, duke zhvilluar një seancë të gjatë në palestër. Në stërvitje ishin të gjithë, përfshirë edhe tre të dëmtuarit, Matondo, Da Silva dhe Telushi.
Telushi pësoi një kontraktim muskulor në stërvitjen e së hënës dhe nuk arriti ta mbyllë gjithë seancën stërvitore. Burime për gazetën bëjnë me dije se vlonjati nuk ka dëmtim, por është përballur me një kontraktim muskulor. Pavarësisht se problemi nuk është serioz, sot dhe nesër do të shihet gjendja e tij, për të përcaktuar nëse do të jetë në gjendje të luajë ndaj Bylisit.
Da Silva pësoi një dëmtim gjatë përplasjes me Sherrin në ndeshjen ndaj Egnatias. Vetë trajneri Kolela është shprehur se sulmuesi ka nevojë për kohë për t’u rikuperuar, por duket se mjekët kanë arritur ta rikuperojnë më shpejt seç ishte parashikuar. Dje dhe sot braziliani e ka rritur shumë ritmin e stërvitjes dhe ka shtuar ndjeshëm shanset për të qenë në fushë ndaj Bylisit të dielën. Nga ana tjetër, për Matondon është thuajse e pamundur.
