Drejtoria Vendore e Policisë Tiranë ka reaguar këtë të Mërkurë për një ngjarje të ndodhur gati 3 muaj më parë, ku një e re nga Kenia u gjet e plagosur në afërsi të banesës së saj. 22- vjeçarja aktualisht ndodhet në gjendje kome në spital.
Reagimi ka ardhur pas akuzave se policia e ka mbajtur të fshehtë dhe nuk e ka ndjekur ngjarjen për të zbuluar të vërtetën.
“Më datë 14.08.2022, një shtetase nga Kenia ka bërë denoncim për humbjen e kontakteve me shoqen e saj, shtetasen J. A., 22 vjeçe, nga Kenia, banuese në një banesë me qira, në rrugën “Pandeli Evangjeli”, e cila më pas u gjet pa ndjenja, në afërsi të banesës së saj. Në lidhje me këtë rast sqarojmë se Komisariati i Policisë Nr. 1 ka vlerësuar denoncimin e bërë dhe ka reaguar në kohë”, njofton policia.
Në përfundim të veprimeve të para hetimore për këtë rast janë referuar materialet në Prokurorinë pranë Gjykatës së Rrethit Gjyqësor Tiranë, e cila ka regjistruar procedimin penal, për veprën penale “Plagosja e rëndë me dashje”, bëhët e ditur nga uniformat blu.
Vajza emrin Joy e cila punonte në një kazino, ndodhet e shtruar në spitalin e Traumës në Tiranë.
