Një operacion policor që nisi në orët e para të paradites në qendrën tregtare “Dardanët” në Elbasan, ku u ushtruan kontrolle në një call-center nga forcat “Shqiponja” dhe agjentët spanjollë të Guardia Civil, është shtrirë në mesditë edhe në Vlorë e Tiranë.
Kontrollet janë kryer kryesisht në lagjen “Pavarësia” të këtij qyteti dhe janë shoqëruar disa persona, kryesisht vajza.
Mësohet se përveç personave të shoqëruar janë sekuestruar kompjuterë, servera dhe dokumente të disa kompanive që dyshohet se mashtronin shtetas të huaj për operacione financiare me metodën e call-center online.
Gjithashtu nga hetimet e deritanishme, mësohet se operacioni ka nisur nga denoncimet e bëra nga shtetasit spanjollë të cilët kanë rënë pre e mashtrimeve nga operatorët dhe punonjësit e këtyre kompanive dhe u janë vjedhur shuma prej miliona euro.
Organi i posaçëm i akuzës ka vënë në zbatimin shumicën e urdhër-arresteve në kuadër të këtij operacioni, por për arsye hetimore nuk janë zbuluar ende emrat e të arrestuarve
Pritet që SPAK apo policia e shtetit të dalë me një njoftim zyrtar për të dhënë më shumë detaje lidhur me këtë operacion dhe personat e vënë në pranga.
