Mediat greke kanë publikuar pamjet e tentativës së përdhunimit nga ana e 28-vjeçarit shqiptar me iniciale S.K. ndaj një 20-vjeçare greke rreth orës 01:00 të mëngjesit të së dielës në zonën e Nicës.
I riu shqiptar njihet nga autoritetet greke si “Dragoi i Pireut”, pasi përveç arrestimit për rastin e 20-vjeçares ai ka qenë në burg i dënuar për disa tentativë përdhunimi.
Në vitin 2018 shqiptari u arrestua në Selanik për tentativë përdhunimi të një gruaje dhe ishte liruar nga burgu në Grevena vetëm në prill të 2022.
Ai është dërguar në prokurorinë publike të Pireut mesditën e së hënës.
Ndërkohë në pamjet e publikuara, shihet e reja greke teksa kërkon me dëshpërim ndihmë nga komshinjtë duke i rënë ziles së derës e duke bërtitur me të madhe: “Ndihmëëë, më ndihmoni para se të vijë prapë ai, më ka thyer kokën nga goditjet”.
Vajza 20-vjeçare u shpëtua nga fqinji pasi arriti t’i rezistonte goditjeve barbare të shqiptarit, ndërsa sulmi ndodhi vetëm 3 minuta larg banesës së saj.
https://youtu.be/8DpHRnzu4kQ
Fatmirësisht pasi fqinji e shpëtoi nga duart, policia arrestoi shqiptarin. Oficerët i kërkuan 20-vjeçares të shkonte në departament për ta identifikuar dhe ai pretendoi se ishte i dehur.
Ndërkohë, në rrëfimin e saj e reja greke ka zbuluar se 28-vjeçari ishte fshehur duke e pritur teksa binte shi.
“Sulmi ndodhi tre minuta larg shtëpisë sime. Unë isha ulur nën një ballkon derisa shiu pushoi dhe ai ishte fshehur para meje. E pashë, kishte shumë plagë në fytyrë. Kishim të njohur të përbashkët dhe dija disa gjëra për këtë njeri. Mënyra se si ai po më shikonte më trembi. E kuptova se kush ishte dhe u tremba shumë”, ka rrëfyer ajo.
“Kur nisa të largohesha, nuk e kuptova se kur erdhi nga pas, kur papritmas ndjeva një dorë që më mbylli gojën dhe hundën dhe filluam të ziheshim shumë pavarësisht terrorit që pata në atë moment. Një grua dëgjoi britmat e mia, unë bërtita “ndihmë” ndërsa ai më godiste në kokë. Më kujtohet kur ai pushoi së godituri, unë vrapova, pavarësisht goditjeve në fytyrë. Koka më është fryrë, syri, vetulla më janë fryrë të gjitha”, ka shtuar ajo.
