Deputetja e Partisë Demokratike Grida Duma në një deklaratë urgjente për mediat ka njoftuar se ka dorëzuar në Kuvend shkresën për të lënë mandatin e deputetes.
“Pak çaste më parë kam dorëzuar formalisht dhe zyrtarisht shkresën për lënien e mandatit të deputetes. Pas një reflektimi të gjatë, për të bërë të duhur për partinë time dhe votuesit që përfaqësoj, ky është vendimi i duhur. Mendoj se në politikë fatet individuale vlejnë të konsiderohen dhe rimendohen vetëm kur shkojnë në një kahje me fatet e njerëzve që përfaqësojmë. Kurrë e kundërta, megjithëse është bërë. Fati i njerëzve që përfaqësoj është misioni që zgjodha. Më e thjeshta do të ishte që të kisha qëndruar”, tha ajo nga selia e Kuvendit.
Duma në deklaratën e saj, shoqëruar nga emocionet ka sqaruar edhe arsyet që e ccuan në marrjen e këtij vendimi.
“Më e thjeshta do të ishte që të kisha qëndruar. Ka nga ata që po presin skutave të përgjojnë për shansin e tyre të humbur t’i ndrijnë parave. Mund të qëndroja thjesht për të mbijetuar, mund të bëja sikur nuk e shoh luftën e jashtme, por shumë vite në politikën e vijës së parë, nuk i jam larguar përgjegjësisë dhe as betejës, madje kam qenë e para. Nuk i jam larguar përgjegjësi edhe kur më kanë goditur personalisht, mjerisht sepse nuk gjetën dot një aferë korrupsioni, një nderje duarsh”, sqaroi ajo.
Ndër të tjera ish-deputetja e PD nënvizoi se nuk ia fal politikës së llumit deklaratat kundër saj, të cilat i kanë prekur të birin.
“Jam sulmuar nga hiena që të më brejnë personalit. Sot do t’ju them që ka një gjë që nuk do ja fal kurrë politikës llumi që ndoshta do jetë pengu, goditja që më bënin mua në brez, godiste pandërprerë tim bir, nuk e kam falur kurrë dhe as nuk do t’ja harroj politikës së llumit dhe shpresoj të ketë qenë një mësim për të. Herë pas herë dalin me fytyrën e ngrirë sikur po shpikin rrotën. Do t’i shfaqen edhe atij fytyra të atyre të korruptuarve të nginjur”, theksoi Duma.
Vendimi i Dumës vjen teksa në 24 orët e fundit emri i saj ishte përfolur në media si drejtuesja e re e një emisioni politik në një nga televizionet kombëtare.
Grida Duma ka qenë pjesë e politikës aktive prej rreth 12 vitesh, teksa në tetor të 2011 deri në shtator 2013 mbajti postin e Zëvendësministres së Integrimit në qeverinë e koalicionit PD-LSI.
Në 2014 ajo u votua Sekretare për Marrëdhëniet me Publikun në Partinë Demokratike të Shqipërisë, ndërsa një vit më pas sfidoi Vangjush Dakon si kandidate për Bashkinë e Durrësit në siglën e PD.
Në 2017, Duma u zgjodh deputete e Kuvendit të Shqipërisë dhe Zëdhënëse e Grupit Parlamentar të Partisë Demokratike.
Mandatin e dytë si deputete të cilin e ndërpreu sot, Duma e fitoi në qarkun e Tiranës në zgjedhjet e 25 prillit.
