Detaje të reja janë mësuar nga dosja e Prokurorisë së Tiranës për “aventurën” e radikalistit Xherxh (Gjergj) Laçi, i cili ka mbajtur të ngujuar për 6 vite bashkëshorten dhe dy djemtë e tij, 15 dhe 17 vjeç në banesën e tyre në zonën e “5 Majit”.
Në dëshminë e bashkëshortes së 52-vjeçarit, ajo i rrëfen hetuesve se Laçi ka ushtruar dhunë psikologjike dhe fizike ndaj saj prej 12 vitesh, por edhe ndaj fëmijëve të tyre të mitur.
Ajo ka zbuluar se bashkëshorti ia kishte ndaluar që të dilte edhe tek oborri i shtëpisë së tyre private.
Ndërkohë, së fundmi radikalizmi i Laçit ka kaluar kufijtë, pasi e ka mbajtur të gjithë familjen të mbyllur ne shtëpi, duke i kërcënuar me armë dhe mjete prerëse që të mos dilnin jashtë.
Dhunën fizike ndaj bashkëshortes ai e ka ushtruar në prani të fëmijëve.
Sipas Elena Laçit, 52-vjeçari paraqiste rrezikshmëri të lartë, pasi para disa vitesh e kishte parë teksa fshihte në një gropë në oborr lëndë eksplozive dhe municione, ndërsa thuhet se mbante një automatik te koka e krevatit të tij.
Në dosje shkruhet se radikali së fundmi kishte filluar që të frekuentonte shpesh xhaminë dhe sa herë që shkonte aty merrte me vete librin e shenjtë “Kuranin”.
Ndër të tjera, gruaja ka dëshmuar se nuk kishte asnjë komunikim me fqinjët dhe se nuk kishte marrëdhënie të mira me familjen e saj dhe të burrit. Familja Laçi jetonte në kushte të vështira ekonomike, asnjëri prej tyre nuk punonte. Në banesë nuk kishte energji elektrike, për shkak se nuk e kishin paguar.
Gjergj Laçi rezulton të jetë me precedentë penale, pasi ka qenë i dënuar për armëmbajtje pa leje në vitin 2013, krim për të cilin ka bërë dy vite burg.
