Në bashkëbisedimin me qytetarët nëpërmjet pyetjeve në rrjetet sociale, kryedemokrati Sali Berisha i është përgjigjur edhe atyre që e kanë pyetur sesi do të realizohet bashkimi i Partisë Demokratike përballë Edi Ramës në zgjedhjet lokale.
Në një kohë kur negociatat për kandidat të unifikuar dështuan dhe grupi i Alibeajt me shumë gjasë do të propozojë të përzgjedhurit e vetë për lokalet e 14 majit, Berisha e la sërish të hapur derën për bashkëpunim.
Pavarësisht toneve të zbutura, kreu i PD u tregua i prerë kur nënvizoi se nga primaret nuk mund të heqë dorë.
“PD e vërtetë, e rithemeluar, ka përcaktuar një procedurë që s’ka demokrat që normalisht duhet ta refuzoje. Por kur 1 vit më parë kaloja nga foltorja në foltore për peng Bashën, kishte edhe të tjerë skeptikë. Sot besoj që është e qartë se të gjitha ato janë përpjekje të Edi Ramës, dhe s’kanë asgjë të përbashkët me PD. Kam qenë dhe jam i hapur që çdo deputet, anëtar i kësaj partie të kandidojë për primare. Por, s’jam kurrë i hapur të heq dorë nga primaret dhe aq më tepër të zëvendësoj primaret me sondazhet. Edi Rama, betejën e ka me 11 dhjetorin, se atë tjetrën, siç provuan kohërat e kishte në xhep”, tha Berisha.
