Presidenti i Serbisë Aleksandër Vuçiç kishte paralajmëruar 72 orë të “zjarrta” në lidhje me raportin midis Kosovës dhe Serbisë, teksa edhe ai e kishte të paqartë se çfarë do të ndodhte pas këmbënguljes së Albin Kurtit për të zbatuar vendimin për targat.
Por duket se sinjali i parë dhe më kryesor është dhënë nga serbë në Veri, pasi në një takim në Zveçan kanë vendosur që të largohen unanimisht nga të gjitha institucionet e Kosovës përfshirë jetën politike, gjyqësorin, policinë apo administratën.
Teksa kryetari i Listës Serbe Goran Rakiç dhe katër kryetarë të komunave me shumicë serbe në veri të Kosovës lajmëruan bojkotin e institucioneve, dhjetra nënshtetas serbë që shërbejnë si efektivë në policinë e Kosovës kanë zgjedhur të heqin uniformat.
Fotot janë duke bërë xhiron e rrjetit, ndërsa pritet me interes reagimi i kryeministri Albin Kurti dhe Presidentes Vjosa Osmani por edhe ambasadorëve në Prishtinë lidhur me zhvillimet e fundit në Veri.
