Lukas Podolski është kthyer në qendër të vëmendjes pas një goli të jashtëzakonshëm të realizuar në kampionatin polak në ndeshjen e luajtur mes Gornik-ut të tij dhe Pogon Szczecin-t.
Ndeshja, që ishte e vlefshme për javën e gjashtëmbëdhjetë të kampionatit polak, është fituar 4-1 nga skuadra e ish-sulmuesit të Gjermanisë. Momenti magjik i ndeshjes ka ardhur në minutën e 73-të kur rezultati i sfdiës ishte 3-1 në favor të ekipit të Gornik, që luante në transfertë mbrëmjen e sotme.
Lukas Podolski ka kthyer mbrapa akrepat e orës duke shënuar një gol që pritet të jetë një nga favoritët për të fituar çmimin Puskas për golin e vitit.
37-vjeçari ka marrë një top në mesfushën e tij dhe nuk është menduar dy herë duke e goditur menjëherë topin drejt portës dhe duke shënuar. Një gjest teknik që i ka lënë pa fjalë të gjithë të pranishmit.
