Protesta e opozitës më 12 nëntor dhe diskutimet për të hyrë apo jo në Kryeministri, por edhe bashkimi PD-PL për ta mposhtur në zgjedhje në mënyrë që t’i marrin postin, duket se nuk e shqetëson aspak Edi Ramën.
Nga Tropoja, shefi i qeverisë ka zgjedhur të ironizojë fort Partinë Demokratike duke “prishur” madje gjuhën teksa tha “le të vijnë se Noc Rrokun do marrin”.
“Putini kërkon që në vendet e NATO-s të ketë rrëmujë. Zgjedhjet janë në maj. Çfarë domethënë kjo, ne do vijmë, do marrim zyrën, do marrim çatinë, do marrim ballkonin. Hajdeni njerëz çohuni. Mendoni se është pa lidhje? Jo ka shumë lidhje, se për të marrë do marrin Noc Rrokun”, tha Rama.
Rama nuk kurseu PD-në as nga akuzat e përhershme që ai po hedh në drejtim të selisë blu sa i përket financimeve ruse, duke thënë se po ndjekin linjën e Putinit.
“Shqipërisë i bëjnë një dëm të madh. Duke e çarë gjithë pjesën që është e angazhuar në politikë në këtë formë, angazhojnë për hesap të Kremlinit një pjesë të shqiptarëve që në mënyrë të pavetëdijshme bëhen vegla të këtyre veglave, por me një ndryshim. Këto vegla paguhen për ta bërë këtë punë. I morën gjysmë milioni dollarë, për të rrëzuar PS-në. Na del që çadra financohej me para ruse”, u shpreh Rama.
