Ministrja e Infrastrukturës dhe Energjisë, Belinda Balluku njoftoi miratimin e marrëveshjes për ndërtimin e Portit të Durrësit.
Porti i Durrësit ka kaluar zyrtarisht “në duart” e investitorëve nga Dubai. Këtë e ka bërë të ditur ministrja e Infrastrukturës dhe Energjisë, Belinda Balluku gjatë një konferencë për shtyp.
Balluku bëri me dije se investimi në terren do të arrijë në 2 miliardë euro dhe sipas saj do të vlejë për ta çuar turizmin në Shqipëri në një nivel ndërkombëtar.
“Hedhim një tjetër hap me projektin për Portin e Ri Turistik të Durrësit, investimi më i madh i huaj në rajon, i cili jo vetëm do të transformojë rrënjësisht qytetin e Durrësit, por do ta çojë turizmin në Shqipëri në një tjetër nivel ndërkombëtar. Miratohet marrëveshja kuadër, ndërmjet Këshillit të Ministrave dhe Eagle Hills Real Estate Development, Albanian Seaports Development Company, sh.a. dhe Nshmi Development L.L.C, për projektin e investimit strategjik “Marina & Jahtet e Durrësit”, shkruan Balluku në FB.
Marrëveshja për shndërrimin e portit të Durrësit në një marinë jahtesh në bashkëpunim me investitorët arabë, tashmë do të duhet të kalojë në Këshillin e Ministrave dhe komisionet përkatëse në Kuvend për t’u votuar më pas në Parlament.
Kjo marrëveshje është denoncuar shpeshherë nga kryetari i Partisë Demokratike, Sali Berisha si një mega aferë korruptive ku po vidhen nga Edi Rama dhe klientët e tij 1 mln metër katrorë tokë për ta shndërruar në Dubai personal të kryeministrit dhe kabinetit të tij.
“Edi Rama, pa asnjë konsultë paraprake, me qytetarët e Durrësit, me grupe interesi dhe asnjeri tjetër përveç xhepit dhe llogarive të tij, po e shndërron portin e Durrësit në Dubain e familjes së tij. Afera e Portit të Durrësit gjer sot është afera korruptive më gjigante në Evropë. Nga ky vendim korruptiv, antiligjor i Edi Ramës, Rama dhe kompania e tij përvetësojnë mbi 1 mln metër katror truall për ndërtime, baras kjo me rreth 3 miliardë euro”, ka thënë Berisha kur është prononcuar për projektin.
Opozita gjithashtu e cilëson aferën të rrezikshme për Shqipërinë dhe argumenton se do të ketë kosto në rrugën strategjike drejt Bashkimit Europian.
Berisha ka deklaruar ndër të tjera se ky është porti i një vendi të NATO-s dhe BE-së, dhe nuk mund të ndryshojë destinacioni i tij, pa marrë më parë miratimin e tyre.
“Në këtë aferë, me pasoja të rënda strategjike për vendin, me pasoja të rënda që synojnë defaktorozimin e Shqipërisë dhe rolit të saj strategjik në transportin e BE dhe NATO, Edi Rama parashikon me makinerinë e mashtrimit të tij, investime prej 2 miliardë eurosh në marinën turistike. Njeriu që ka marrë përsipër këtë investim, parashikonte një investim prej 4 miliardë eurosh në Serbi, dhe përfundoi me një investim prej 20 milionë eurosh. Dëmi është i pallogaritshëm sepse me këtë lëvizje, taksapaguesit shqiptarë gjobiten me një së paku 1 miliard euro, që sipër Edi Ramës do përdoren për ndërtimin e Portit të ri në Porto Romano”, është shprehur kreu i selisë blu.
